30‧6-3‧7-2023
第三日食完早餐，表妹過咗嚟一齊玩，中午去舅婆屋企食午餐，因為表弟 BB 要走了，之後大家狂食水果，再去另一姨婆新屋參觀，兩個女又狂食零食，果凍朱古力餅乾花生糖果大放題 -_-"
黃昏返太婆屋企食晚飯，期間發生懷疑唔見咗家姐事件，嚇到我喊 !!!
事源我坐喺二樓食水果，家姐同我講上三樓，轉頭妹妹揾家姐，我話佢喺上面 (咁啱姨婆食完晚餐走，成班人落咗樓下)，妹妹話家姐唔喺上面，我帶佢上三樓揾，唔見咪落返二樓問公公，公公話家姐落咗去，我帶住妹妹落地下問婆婆，跟住大家都話唔見，冇落過嚟，然後我逐層揾同嗌家姐個名，但冇人應 …… 全部人再逐層揾又上天台、都係冇人應，我嚇到個頭暈同手都震埋 …… 我以為佢跟住成班人落街，俾人趁黑/亂拖走咗 ...... 後來發覺細舅公唔喺度，兩個舅婆打俾佢又冇人聽，後來啲親戚喺地下見到佢地返嚟了，原來家姐拖咗細舅公去買嘢 ......
第四日落大雨，早上帶兩女參觀大舅公的瓷磚舖，去埋家姐仔很去咗 3 日嘅大零食店買嘢食，再返太婆屋企食埋午餐就撘車回港了 …… 呢幾日每人應該食咗超過 50 粒荔枝，妹妹更加一晚食咗一樽花生 !
兩女離開時一上車就喊了，話好想住耐啲唔捨得走，阿媽我又何嘗唔係？
