東京中部小旅行 2010 (Day 1) Part Ⅲ~ Sanrio Puroland

圓夢之旅 ~ 第一天   (原宿、自由の丘、Sanrio Puroland)              16-1-10

     話說我地 hea 住行完自由の丘，終於都到 3:00pm，夠鐘可以撘 JR 過去京王多摩駅既 Puroland 喇，預計車程需時 40 mins，我地打算買 4:00pm 後入場既夜遊券 ~ ￥2000@，樂園收 6:00pm，諗住兩個鐘都夠買野同影相啦  (果時都唔明點解我地咁悶都都唔早 o的過去) 

     結果 … 邊個話 40 mins 到架 !!!??

     唔知係撘既班次問題 (站站停) 定係俾人(Ricky)點，我由 3:15pm 撘到 4:00pm，路程都只係去一半 

 

我一邊望住隻錶、個心一直向下沉…最後到達時已經係4:40pm，果下已經想喊…跑到樂園閘口都已經 4:55pm 啦，職員姐姐仲同我講話冇￥2000 夜遊券喎，要￥3000，我地見咁貴，又得番一個鐘 (唔入去我又唔甘心 !)，結果係我自己一個入去，Ricky o係附近行下等我。

    入到場，得番 1 個小時做得 o的咩 !? 咪極速搵個販賣場買精品囉，跑上跑落終於搵到，當時頭都暈埋，途中求其影左幾張相就算。

 呢部 Hello Kitty 既朱古力豆機好靚，可以帶返屋企裝飾就好



     o係上 2/F 既途中見到呢部貼紙相機，海報上面既 CK 鼠情侶 o係度玩空中飛人，超靚呀 !! 不過唔知 o的貼紙相有冇 CK 鼠份，我冇時間試呀 !  如果有人影過就話我知啦 ! Thanks ~

     極速掃左 o的大堆頭既精品 ( 50th 週年產品，集合眾多 sanrio 卡通人物，ck 鼠只佔一丁角) 之後，望下隻錶，已經係 5:45pm 啦 !!?  立即衝返落大堂睇下見唔見 CK 鼠出現同人影相，當然冇，好似得一隻唔知咩公仔 (唔得閒留意呀 !!) o係度，跑黎跑去我成個人已經熱到臉都紅晒

     於是我指住 ck 鼠既精品問 o的職員：ck 鼠 o係唔 o係度，可唔可以叫佢出黎影張相。個職員「呀」左一聲就入左去後台，但出番黎就同我講「Sorry ! He is not here.」當時我已經眼紅紅，行左幾步想走，但唔甘心，行返轉頭再問多次個職員，話我從好遠黎架 … 職員叫我等一等，然後見佢同另一個職員一邊講緊野、一邊行出黎，大致都係話 ck 鼠唔 o係度，唔好意思之類 … 我唯有離開，但雙眼已經有淚光，一出 Puroland 閘口就見到 Ricky 等緊我，而我都終於忍唔住喊左出黎 

     之後，我地 o係附近坐左一段時間先離開。

Bye Bye 喇 ~ 都唔知仲有冇機會再黎喇

 商店外的這幅 Kitty 圖畫好靚，我鐘意個好似雪屋既意境



呢張 o係京王多摩駅外對出既 Area Map，圖案已經改左，以前有隻大 o的既 ck 鼠架 !  而家剩番 Hello Kitty 既家族和朋友圖



 Map 背面有「一粒仔」位置既 ck 鼠介紹神社


     喊夠，又凍，於是返新宿吃晚餐，原本打算到旅遊書介紹既豬舍，一間 o係天花掛左兩隻大豬籠、食全豬宴既餐廳食，點知搵黎搵去都搵唔到，問便利店的哥哥仔同途人，都係指向一條住宅區既小巷入面，我地轉完一圈又一圈， o的小巷好黑好靜，後來都係唯有放棄，出番新宿既大街搵野食，其實有冇人知我講邊間「豬舍」呢 ? 位置 o係邊 ?

     行下行下，見到都幾出名既無敵家，就一於試呢間啦 !

 排緊隊時，職員已遞上餐牌俾你睇，轉頭仲幫你落埋 order，以加快人流既速度。

 排左 30 mins 隊左右就到喇，排 o係我背後既係一家人黎玩既自由行，一家人黎玩一定好開心，起碼會好溫馨，我都好希望有機會同我的家人去一次自由行  



 無敵家門口的「鑊」，好靚喎

↑↓ 上：我的「特濃豬骨湯底拉麵」~ ￥1000，下：Ricky 的醬油拉麵 ~ ￥850，兩碗都好好味呀 ! 湯底好濃香 ( 我果碗話明特濃嘛 ! )，夏天食可能會有 o的漏，但冬天夠暖呀 !  尤其是隻溫泉蛋，又軟又滑，連平時對溫泉蛋一般的我都覺得超美味，如果可以追加就好



     食飽就返酒店休息喇，今日已經好累 … 返到酒店仲要影戰利品呢 ! 唔好怪我，今日受左刺激顛左 



 忌廉的嬌俏 strawberry 帽仔衫 (但仲未迫到佢著 ) & 玩具

 自由 の丘買既毛毯仔及其他記念品

 好似好多，但部份係幫人買既，而且有 o的都冇 ck 鼠既 !?

     另外都好激氣既係，我返左黎香港冇幾耐，Puroland 先陸續開始出 20th/50th 週年(究竟係 20 定 50 週年呢 !?  ) o既精品，結果我咪要o係香港用貴價買番晒 o的 ck 鼠精品囉 !! 仲要唔一定買得到喎 !!!!!!都話我同 ck 鼠有緣無份架啦 ~~~~~